|
كل سنة وانتوا طيبين وعقبال 2108 تقريرى عن اول يوم فى السنة الجديدة اللى هو اللى فات انا كنت يوم 31-12-2007 كله نايم فى الاوضة بتاعتى , بنام وبصحى ومشغل الكومبيوتر بتابع عملية بيع موقع عندنا , والدنيا كانت غير مبشرة بخير إطلاقاً ومستنى فى نفس الوقت تليفون من محمود توبة ( زميلى فى الكلية الكريمة ) عشان يقولى انه بسلامته صحى عشان اعدى عليه ونذاكر :s وفجأة اصحى من النوم , ألاقى الساعة 12 ودقيقة :d كل سنة وانا طيب , بقينا فى اول دقيقة من اول يوم فى سنة 2008 الدنيا بايظة فى الشغل , ومبهدلة فى الاصحاب , ومبهدلة فى الحياة والعلاقات كل سنة وانا طيب , يظهر انها سنة كئيبة وزى الفل حتى ما لحقتش اعمل زى البنى آدمين وآخد قرارات السنة الجديدة والكلام اللى الناس المفروض بتعمله ده :s قعدت حبتين على الانترنت وفتحت الماسشينجر , صدمنى واحد بمعاد دفع فلوس السيرفر :d واللى انا كنت فاكرها بعد المعاد اللى قاله بشهر كل سنة وانا طيب ورحت قافل النت قولت ابص على موبايلى الظريف , لقيته حوالى 30 ميسد كالعادة وماسيجن ماسيج منهم Please call me رسالة الشعب المصرى , من واحد المفروض انه كان يكلمنى عشان شغل فى اليوم ده :s والماسيج التانية تهنئة بالسنة الكريمة , وباقى الميسدات خدت بلالى من وسطهم رقم اسامة صاحبى , رحت اديته ميسد بدورى , كلمنى , قاللى انهم فى صالة البلياردو , نزلتلهم , قعدنا نلعب بلياردوا حوالى 4 ساعات , وحبة على القهوة , وروحنا حاولت انام ما عرفتش , قومت اتفرج ع التليفزيون , قناتى المفضلة mbc2 مافيش حاجة عدلة قمت على الكومبيوتر , اتابع عملية البيع من تانى , من الساعة 8 لحد الساعة 1 , وجالى عميل للموقع , وكعادتى ما بصدقش العميل لحد ما يقوم بالتحويل بالفعل , الساعة 1 ونص نزل عشان يحول , وانا مستنى رده باتمام التحويل , كلمنى قاللى ان البنوك هنا مش هتشتغل قبل الساعة 4 ونص كل سنة وانا طيب , قولت يبقى اكيد ده حوار ولا هيحول ولا نيلة وهو بيقفل , جالى الراجل ساعى البريد , بجواب ظريف بستناه , شيك مبعوتلى , خدت الشيك ولبست ونزلت وروحت وديته البنك عشان يتصرف , وسحبت فلوس من حسابى وبعتها للراجل اللى كان قاللى على معاد دفع الفلوس ده :s كل سنة وانا طيب السنة بادئة بمصاريف :d وبعدها الراجل كلمنى قاللى انه حول بالفعل وبعتلى رقم التحويل , استغربت وقولت نتاكد كالعادة , بتصل بمكتب ويسترن يونيون ماحدش بيرد لبست وخدت تاكسى وروحتله , لقيته قافل ومكتوب فى ورقة متعلقة على الباب , النهاربدة اجازة بمناسبة السنة الجديدة , وكل سنة وانتوا طيبين ابتسمت ابتسامة سخرية , وخدت تاكسى ورجعت بيتنا استنيت محمود من تانى يكلمنى عشان اروحله نذاكر , وكالعادة ما كلمنيش , ونمت , وصحانى الساعة 9 مع وابل من تانيب الضمير كالعادة ونرفزنى كالعادة واستفزنى , وانتهى الحوار انى مش هاروحله طبعاً النهاردة لأنى كمان بقة عندى شغل الساعة 1 بالليل , اللى هو دلوقتى بالفعل وانا بتسلى فى كتابة التدوينة دى وانا شغال والمفروض انى عندى بكرة امتحان الـ Final فى المستوى التاسع فى كورس الانجلش اللى باخده وربنا يستر فيه كل سنة وانا طيب وكل سنة وانتوا طيبين :D
|
