|
ههههههههههههههه طبعاً حاجة غريبة جداً أستفزتنى انى اعملها قسم خاص يا مدونتى وآدى أول تدوينة فيها "هاى دوداااااااااااا
ياترى عاملة ايه؟؟؟؟
النهاردة بقة كان اول يوم فى الكلية
كان يوم رهيييييب
رحت الكلية
وطلعت ابص ع الجدول
طبعا كانت الدنيا زحمة وكدة
المهم نقلت الجدول وكلمت بنت عشان آخد منها قلم وورقة :$
المهم نقلت الجدول ونزلت انا والواد صاحبى والبنتين تحت رحنا شربنا بيبسى وبعدين نفضنا للبنتين بحجة اننا رايحين لواحد صاحبنى فى تجارة
وبعدين رحنا راجعين ع الحتة بتاعة الجدول تانى كنت بدور على مكان محاضرات الانجلش عشان اقابل هيدو
المهم عرفت فين السيكشن وكان عندهم محاضرة المقابلة رحت قبلها كان الناس قاعدين فى السيكش مستنين
وانا واقف ع الباب انا وصاحبى ...ماشاء الله الدفعة كلها بناتيت زى القمر ...
وكلهم كانوا بيبصوا على انا وصاحبى ....أصلنا ملفتين للنظر قوى D:
المهم هيدو كانت واصفة الطقم اللى هتلبسه انه ايشارب وردى وشيميز بمبى وجينز وكوتش ابيض وهى طويلة ومش مليانة
والحمد لله تقريبا 3 اربع الكلية بالمواصفات دى :O
المهم نزلنا تحت انا واحمد صاحبى نتمشى فى الكلية قابلنا ناس اصحابنا كتير قوى
وقابلت بنتين كنت اعرفهم ايام ثانوى بس هما اكبر منى بسنة فعشان كدة هما فى تانية
المهم قعدنا معاهم حبة واصروا انهم يعرفونا على شلتهم ...شلة لذيذة جدا
المهم قعدنا حبة معاهم وبعدين قمنا نتمشى بقة واتعرفنا على بنتين فى تانية واحدة من تجارة خارجية حلوان ما تعرفيش ايه اللى جايبها هنا وواحدة اسمها وسام من حقوق
بس دول بقة بنات كويسة فضلنا قاعدين معاهم حبة وكدة وبعدين قعدوا يسألونا هتقعدو فين وكدة واحنا طبعا لأننا جداد كان صعب اننا نحدد مقرنا
المهم ان بقة لينا مقر احتياطى انا واحمد وقولناه لكل الناس بعد كدة
وبعدين وسام ونرمين دول مشيوا راحوا على كلية الحقوق عشان وسام وانا ما رضيتش اروح ورحنا راجعين ابص على هيدو الاقى المقابلة خلصت وفى كام بنوتة كدة قاعدين فى السيكشن
منهم واحدة تيبيكال مواصفات هيدو
فدخلت بجرائة وبسأل: هو قسم الانجلش هنا؟؟؟
فراحت ردت واحدة قالت : لأ...
لقيت البت اللى بمواصفات هيدو دى قالت: لألألأ بياخدوا المحاضرات هنا
المهم رحت سئلتها أنتى فى انجلش راحت قالت آه
قولتلها أنتى هيدو؟؟؟
قالتلى : أيه؟؟؟!!!!!!!!!!!!
قولتلها وانا فى منتهى الاذبهلال والاضمحلال: هداية؟؟؟ :$
راحت قالت لصاحبتها اللى جنبها بيقول ايه؟؟؟
رحت انا طبعا توقعت انها سمعت بس مش فاهمة فبالتالى مش هى رحت ماشى وقولتلها اسف جدا كنت فاكرك واحدة اعرفها
ورحت ماشى
نزلت تحت فضلت قاعد حبة فى المقر مع الشلة اللى فيها البنتين اللى اكيبر مننا بسنة دول
وبعدين مشينا روحنا واحنا ميتين........ بس كدة
والعزاء آخر الغابة يمين D: KiNgELE18" الكلام ده لقيته فى فولدر عندى أسمه " Sent Emails" محطوط بتاريخ 18 سبتمبر 2004 ودودا دى كانت دودا تينز واحدة من اعز أصدقائى اللى عرفتهم فى تاريخ الحياة كنت ساعتها باعتلها الايميل ده بإسم " تقرير أول يوم كلية " على حسب اتفاق بينا انى ابعتلها تفاصيل اول يوم ليا فى الكلية كان عامل ازاى عشان دودا أكبر منى بسنة فكانت جربت طبعاً الموضوع وكانت عاوز تشوف انا هاعمل ايه فيه :D شىء كوميدي قوى موتنى على نفسى من الضحك أول ما شوفته فعلاً بس ذكرى حلوة جداً
|
