|
شىء رائع فعلاً تاريخ اليوم اللى عدى ده كان لازم يتسجل وكان لازم احكى لحد قبل ما يحصلى حاجة كل اللى حصل النهاردة اليوم النهاردة مشى على الرتم الطبيعي بتاع كل الايام اللى ماشية كلها جنب بعض فى طابور واحد ما بيختلفش , ممكن الصغير يمشى قدام والطويل ورا , بس هو هو نفس الطابور صحيت من النوم كالعادة وانا ما لحقتش انام كويس الساعة 6 الصبح على تليفون من محمود المصري بيقولى انا جايلك بعد ساعة , وصحيت واستعديت ان الراجل جايلى , وجالى الساعة 8 ونص !! وإتكلمنا كعادتنا فى الشهرين اللى فاتوا عن مشكلة التأخير فى الشغل اللى متأخر ده كله والبهدلة اللى حاطانا فيها حالة تأخير الشغل ولخبطة المواعيد واللى مأثرة علينا وعلى الاستاف كله على الاقل على فتحى المدير الكبير اللى يا عينى ما بقاش ينفع يكون مدير خالص من كتر الهم اللى شايله حالياً وبقة يمشى يكلم نفسه ولا محمود اللى الدنيا خبطت معاه مع خطيبته ومعاد شبكته وشقته ومواعيد قسطها اللى جه فى الوقت اللى هو كان حاسب ان المفروض كان يبقى فيه الشركة شغالة بقالها شهرين ... وبالتالى الراجل بيلف حوالين نفسه عشان يجمع فلوس القسط اللى طبعاً ما بقتش موجودة مع صدمات التأخير والزيادات اللى الله اعلم بتيجي منين واللى مسببة التأخير ده , رغم إن كل حاجة مدروسة 100% , وغيرها كتير من اللغبطة اللى حصلتله فى علاقاته وقرايبه وصحابه وشكله العام كمان :s أما عني .... الأستاذ اللى مفني حياته فى الشغل ( بمعنى الكلمة بما إنى لسه دلوقت سايب حبيبتى عشان مش مستحملة انى بقالى سنة ونص شغال متواصل مش لاقى وقت أقابلها فيهم !!! ) فطبعاً مش هاحكى عن اللى انا فيه عشان مش ناقصة تعب ولا تقطيع قلب .... ممكن نختصر الكلام فى كلمة واحدة بعد يومى الجميل النهاردة ده ... انا بقيت محبط من كل حاجة من الحب , من الشغل , من البيت , من اصحابى , من علاقاتى , حتى من الكومبيوتر ...... الحب وسيبت حبيبتى دلوقتى , عشان حبة حاجات انا شايفها تافهة وبسيطة ودى وجهة نظرى , لكن هى غلط تقريباً زى ماهى شايفة , عشان المقابلات , المكالمات , الماسيجات ... إلخ , بإختصار الوقت اللى مش ملكى .... زهقت وحقها تزهق من كتر الوعود اللى ما بتتنفذش عشان الظروف اللى بتحصل , ماهو مهما كانت هتستحمل او قالت هتستحمل مش بإيديها انها تستحمل فوق طاقتها او تستحمل حاجات مافيش بنى آدم يستحملها ... برضه مش هيكون عذر انى فى البداية قولتلها الحياة معايا صعبة قوى, ولا انى نبهت ع النقطة دى اكتر من مرة , واكتر من مرة حاولت اسيبها عشان خاطر النقطة دى وهى كانت متمسكة بيا لآخر الحدود , بس انا كنت خايف من يوم زى النهاردة , كان نفسى انا اللى اسيبها عشان ابقى مجبر انى ما اكلمهاش تانى , لكن اللى حصل ده هيخلينى مش قادر ما اكلمهاش تانى بحبها فعلاً انا قافل معاها بقالى 15 دقيقة دلوقتى , ونفسى اكلمها , ومش عاوز اكلمها عشان ما اتعبهاش اكتر , لو كلمتها انا عارف , هاكسب بالكلام الرقيق , والاسلوب الرومانسى ... وهتقتنع وهنرجع ... ويومين تلاتة ولا اسبوعين تلاتة ويرجع الوضع زى الاول وأكتر ونوصل لنفس النقطة من تانى , ويمشى السيناريو زى ما بيمشى , ماهو أصل دى مش أول مرة يحصل فيها كدة , الكلام ده بيحصل وبيتكرر من 16 -1 -2008 التاريخ اللى اتقابلنا فيه عشان اصارحها بكل حاجة محبطة فى علاقتنا وانها عشان تنجح هتبقى محتاجة صبر كتير , وقالت هتصبر مروراً بـ 26 - 2 - 2008 اللى قولتلها فيه نكتب النقط ونحددها وكان من ضمنهم النقط اللى خليتنا دلوقتى نسيب بعض ... لكن هى كانت واثقة انها هتستحمل وما رضيتش تكتبهم .... لكن دلوقتى كانت النتيجة زى ما توقعت , ما قدرتش تستحمل ... يمكن كل اللى كان بيعرف انى مرتبط بيها كان دايماً يقولى خلى بالك منها , انا عارف فكرتهم ايه , وهى ما فهمتش النقطة دى ... فكرتهم انهم عارفينى من فترة طويلة وعارفين الحياة ماشية ازاى , عارفين انهم مثلاً زمايلى فى الجامعة وما شافونيش بقالهم سنتين , او عارفين انهم اصحابى بقالهم 5 سنين وشافونى فيهم مرتين تلاتة !!! انا عارف انها ممكن تقرا الكلام ده وممكن تقرا كل الكلام التانى اللى انا عارف انى هاكتبه دلوقتى وانا فى الحالة دى بس والله دى مش محاولة مقصودة للضغط عليها ولا حاجة بعملها بهدف ... انا فعلاً محبط ومخنوق ومحتاج أحكى اللى حصل النهاردة وبما ان مافيش حد فعلاً ينفع احكيله , ولا حد بثق فيه او حد الاقيه صاحبى اللى احكيله , فالنتيجة انى بفضفض هنا فى اجندتى الجميلة .... وعلى فكرة برضه دى مش احدى محاولات جذب الاصحاب .... انا حياتى فيها كفاية من الاصحاب ... اخنقت ومش عارف اعمل ايه فعلاً تعتقدى ممكن الموضوع يعدى ؟؟؟؟ مش عارف ..... ومش عارف لو عدى هل هيعدى ونرجعله تانى ولا مش هنرجعله ؟؟؟
|
